دررئو کوَهنێن اَهدنامَگئے دومی کتاب اِنت. دررئوئے کتابا اے کِسّه مان اِنت که هُدایا چۆن وتی هِزمتکار موسّائے وسیلها وتی مهلوک چه مِسرا در کرت و چه مِسریانی گُلامیا رَکّێنت. اِسراییلی که چه مِسرا دَر آتک و شُتنت، راها هُدایا موسّا سینائے کۆهئے سرا لۆٹاێنت و وتی پرمانی سنگئے دو وانِکئے سرا نبشته کرت و موسّائے دستا داتنت. هُدایا په مهلوکا زندئے کانون و رهبند گیشّێنتنت و هُکمی دات که تمبوے اَڈّ بکنێت که منی شان و شئوکت شمئے همراه ببیت. اِسراییلیان گیابانا تمبو و کُربانجاه تئیار کرتنت و هُداوندئے شان و شئوکت جمبرێئے تها بوت و تمبوا آتک. کتاب همے جاگها آسرَ بیت که تمبو چه هُداوندئے شان و شئوکتا سَررێچَ بیت.
