پێدائِش کوَهنێن اَهدنامگئے ائولی کتاب اِنت و سرجمێن پاکێن کتاب چه همِشیا بِنداتَ بیت. پێدائِشئے کتابا جهانئے جۆڑ بئیَگئے کِسّه مان اِنت. اِشیا ابێد، گُناهئے بندات بئیَگئے کِسّهای هم مان اِنت که ائولی مردمان، بزان آدَم و هئوایا چۆن هُدائے ناپَرمانی کرت و گُناها کپتنت. پێدائِشئے کتابا اے کِسّه هم آرگ بوتگ که نوهئے زمانَگا هُدایا گُناهانی سئوَبا توپّانے آورت و جهانی تباه کرت، بله هُدایا نوه پرمات که بۆجیگے اَڈّ بکنت که نوهئے جند و آییئے لۆگئے مردم بِرَکّنت.
کتابئے دومی بَهر یَکّ هانَدانێئے کِسّه اِنت، بزان اِبراهێم و اِبراهێمئے چُکّ اِساک، اِساکئے چُکّ آکوب و آکوبئے دوازدَهێن مَردێنچُکّانی کِسّه، که چۆن هُدایا وتا اِشانی دێما زاهِرَ کرت. آکوبئے یَکّ چُکّے ایسُّپ اَت. ایسُّپ، براتان بها کرت و سَری مِسرا کپت. ایسُّپ مِسرا گُلامے اَت، بله رندترا مِسرئے هاکم جۆڑ بوت. هُدایا ایسُّپئے برکتا آییئے سجّهێن هانَدان و دگه بازێن مردمے چه مزنێن ڈُکّالێا رَکّێنت و اے پئیما، اِبراهێمئے نَسل دێما رئوان بوت. سَکّ باز وهدا رند، چه اِبراهێمئے نَسلا مئے رَکّێنۆکێن ایسّا مسیه پێدا بوت که په اِنسانانی گُناهانی شۆدَگا وتی ساهی کُربان کُرت. ایسّا مسیهئے آیَگئے بِنداتی پێشگۆیی هم، پێدائِشئے کتابا مان اَنت.
